ازاى تلف سيجاة حشيش؟؟؟؟؟؟

زاي تلف سيجارة حشيش ؟؟؟؟؟؟؟؟ بدون استغراب .....

بلاش تستغربوا من عنوان الموضوع .. هو فعلا الموضوع عن كيفية لف سيجارة
الحشيش بس يا ريت تقروه للآخر وما تستعجلوش في الحكم عليا .. بكررها ياريت
تقروه للآخر

أول حاجة بتجيب قرش الحشيش أو التمن أو الربع وتسيحه علي النار .. فبيتمط أو يتفرك منك
تاني حاجة تجيب سيجارة عادية وتفضي التبغ اللي فيها
ثالت حاجة تجيب ورق بفرة وده طبعا كلكم عارفينه
وأخيرا بتحط اللي سيحته علي النار من القرش مع تبغ السيجارة وتلفهم من تحت
بورق البفرة بحيث إن الربع بيلف سيجارتين أو تلاتة علي حسب اللي بيشرب
ودماغه .. هل هو بيستحمل أو لأ .. هل هو جديد في الكار أو لأ .. هل هو
بيتسطل أو مش بيتسطل حتي لو شرب الحشيش خام من غير تبغ

أو ممكن تحط ثمن حشيش علي حجر شيشة وتشربه

أو ممكن بعد ما تلف السيجارة بتحطها في كوب وتقفل عليه بغطاء وتفتح الغطاء بعد خمس دقايق وتشم الدخان

في طرق كتيرة تانية غير الطرق دي

بس اللي بيعملوا كده مش واخدين بالهم من حاجة مهمة جدا

من ان ربنا شايفهم .. تخيلوا لو واحد بيلف سجاير أو بيشرب حشيش وربنا
افتكره ساعتها .. وكلنا عارفين أنه يبعث المرء علي ما مات عليه .. تخيلوا
الشخص ده هيقابل وجه ربه الكريم
يوم القيامة إزاي .. أنا بتكلم بصفة عامة علي أي حاجة حرام بنعملها .. مش شرط شرب الحشيش أو الخمرة اي حاجة فيها غضب للمولي عز وجل

حد فينا ضامن عمره ولا عارف هيموت امتي !!

حد فينا يرضي إنه يموت وهو بيعمل حاجة تغضب ربنا

تخيل إن الذنب اللي بتعمله ده هو آخر حاجة هتعملها في حياتك
ترضي إن آخر حاجة تعملها في حياتك تكون ذنب ومعصية !!
وإنها تكون الحاجة اللي انت هتبعث عليها _والعياذ بالله_ يوم القيامة

علشان كده .. علي طول بندعو الله ( اللهم أحسن خاتمتنا )

ولما تيجي تسأل شاب من اللي بيشربوا حشيش بتعمل كده ليه بتبقي أوشكت إنك تولع في نفسك قبل ما تولع فيه

يقولك : أي فرح وأي حنة وأي خطوبة اليومين دول لازم يكون فيهم حشيش وبانجو علشان نجامل الناس اللي جاية
( تجامل الناس في الغلط وفي الذنوب وفي الحرام )

ويستفزك ويقولك : ولازم الشباب اللي في الفرح ياخدوا واجبهم تالت ومتلت ..
ولو سألت حد من الشباب يقولك : أنا لازم أشرب علشان صاحب الفرح مش يزعل مني
( يعني خايف علي زعل صاحب الفرح ومش خايف من غضب ربنا !! )
أو يقولك : أنا لازم علشان مش أظهر عيل صغير قدام أصحابي وأظهر أقل منهم وعلشان أظهر رااااااااااجل قدامهم
( يا نهار إسود .. هي الرجولة بشرب الحشيش !! )

أو يقولك : أصل أصحابي اتراهنوا عليا إني لو شربت حشيش هتسطل وهدوخ ومش
هعرف راسي من رجليا .. وأنا حبيت إنهم يخسروا الرهان ( بيتراهنوا في حاجة
تغضب ربنا !! )
والأفندي المحترم شرب أول مرة واتسطل وأصحابه ضحكوا عليه فاتغاظ منهم وشرب
تاني مرة واتسطل بردو فقلبت الحكاية بعند معاه وقالك لازم أشرب ومش أتسطل
علشان أصحابي ما يضحكوش عليا وشرب تالت مرة ورابع وخامس و .. وعاشر لحد
مابقي كييف وبقي راجل من وجهة نظرهم وبيشرب أتخنها قرش حشيش ومش بيتسطل
(برااااافو عليك .. راجل فعلا !!)

واللي يفرس الواحد من الغيظ لما تيجي تسأل واحد من اللي بيشربوا حشيش وتقوله : هو الحشيش حلال ولا حرام ؟
يقولك : لو حلال .. أدينا بنشربه
ولو حرام .. أدينا بنحرقه

وتسأل واحد محشش وتقوله : بتشرب خمرة أو بيرة ولا لأ
يقولك : لا يا عم .. حد الله ما بيني وبين الخمرة .. الخمرة حرام

( يعني الخمرة حرام والحشيش مش حرام !!!!!!!!!! )

كل ما يذهب العقل فهو حرام

بجد ...
الموضوع ده بقي مستفز أوي وبقي أمر واقع .. والحكومة مش قادرة تمنعه .. ده
الحشيش بيتباع دلوقتي زي السجاير بالظبط وفي كل حتة وعلي الملأ .. زمان كان
الشاب بيتكسف يمشي وهو بيشرب سجاير في الشارع
دلوقتي .. العيال اللي لسة في اعدادي ولسة ما طلعوش من البيضة _زي ما بيقولوا_ تلاقيهم بيشربوا سجاير عيني عينك
وفي حوش المدرسة
أما طلاب ثانوي والكليات فعادي جدا .. اللي يشرب سجاير يبقي واد عيل صغير
لسة .. شاب قديم رجعي مش ماشي مع الموضة واللي يشرب شيشة يبقي شاب كويس ..
واللي يشرب حشيش يبقي شاب روش طحن وجامد آخر حاجة

أما يا عيني بقي علي الغلابة اللي ما لهومش في الحوارات دي .. لا بيشربوا
حشيش ولا شيشة ولا حتي سجاير .. نقول عليهم .. شباب معقدين .. انطوائيين ..
متخلفين

إحنا في زمن العجايب .. بقي هم دول شباب الاسلام اللي سيدنا محمد هيباهي بهم الأمم يوم القيامة !!!!!!!!!

اللهم اهدى شباب المسلمين

ارجوا الرد على هذا الموضوع
وجزاكم الله كل خير

جزاك الله كل خير

ايه رأيك فى اللفه حرام ولا مش حرام

» صور مضحكة من سجن طرة تجمع العادلى والمغربى وعز يشربون حشيش وصور لمبارك
» محمد منير ازاى