حب حب حب
يا اخوانا انتم مش ملاحظين ان الكلام العاطفي والتعبيرات الرومانسية زادت قوي اليومين دوووول دي مش بس زادت لا دي رطرطت
حبيب قلبي , روحي , الحتة اللي في الشمال , نور عيني ,واحشني يا غالي ,
فينك يا قمر , والنعمة الشريفة بموت فيك , مقدرش أعيش من غيرك, يا عمري
أنا , يا روحي أنا , يا جميل أنت
الكلام الحلو دا كله ما كانش في قاموسنا اليومي قبل كدا ولا كمان الكلام
دا مش بيقوله راجل لست أو ست لراجل لالالالالالالالالالا دا ممكن يقوله
راجل لراجل وست لست
وأي حد يقابلك يقوم رازعك طقم حنية كدا من غير أي مناسبة وساعات من غير سابق معرفه
الشئ اللي يدهش ان شلال الحب والتعبيرات الجميلة ده جاااي في وقت الحب انتهي فيه تماما , والناس ما بقيتيش طايقه بعضها
ومع ثورة الاتصالات الحديثة وظهور عالم الانترنت وتوفير رسايل ومسجات
جاهزة لاتتعب دماغك ولا تفكر كل اللي عليك Search وفي لحظة يكون بابا
Google حضرلك ميت ألف رسالة انقل واديهاSent وصلت يا معلم
لا نرجع لورا وزمااااااااااااااان أيام أسرع وسيلة إتصال إنك تروح لحبيبك
بنفسك وزي ما قال عبدالمطلب ساكن في حي السيدة وحبيبي ساكن في الحسين
وعلشان أنول كل الرضا يومياتي أروحله مرتين
ومع التقدم العلمي الرهيب ونسمع لبني عبدالعزيز وهي بتقول لعبد الحليم
حافظ في الوسادة الخالية ومكالمات التليفون النااااااااااار اللي كانت
بينهم طووول الليل ولبني بتقوله بصوتها الرقيق اللي يهبل دا " صلاح اقفل
بقي يا صلاح " وصلاح مش عاوز يقفل صـــــــــلاح كانت بتقولها بطريقة تهبل
يا جماعه من حلاوتها كان نفسي يبقي اسمي صلاح طبعا كان بيتكلموا بالساعات
طول الليل من غير أي مشاكل كانوا بيتكلموا في زمن شركة الاتصالات بتدفع
فلوس للمشتركين علشان تشجعهم يتكلموا أصلا
ومع مرور الزمن ظهر الانترنت والبلوتوث والألفية التالتة نتفرج علي هاني
سلامة ونور وإزاي تخلي البنات تحبك وساعات في الشات والكلام الجميل والله
نور تهبل من غير حاجة مع إن نظرها راح من الكمبيوتر ( عيونها فظيعه ) كنت
هسقط بسبب الفيلم دا وهو بيقولها يخرب بيت عينيكي
وفي عصر الموبايل ظهرت مجموعة جميلة من المصطلحات الـ Peace خالص
تلاقي اللي بيكلمك في آخر المكالمة بيقولك " يلا باي " ايه Yalla Bye دي
كمان ؟؟ أنا أعرف YallaDown مش يلا باي كأنها مش طايقك أساسا ونفسها تخلع
بأي شكل منك .. وبعدين استكمال مسيرة التطور ظهرت C U بقي إيه دي كمان مش
عارف ؟؟
لا والقفلة الاخر حاجة للمكالمات
تلاقي اللي بيكلمك بعد 3 ساعات ضحك وهزار وكلام فاضي من اللي قلبك يحبه
بتقولك وصوتها يقطع القلب وبمنتهي الأدب " لا إله إلا الله " بمنتهي
التأثر وأنت لازم ترد " سيدنا محمد رسول الله " عليه أفضل الصلاة وأزكي
السلام أمووووت وأعرف إيه موقع الجملة دي هنا في الكلام وبعدين أنا مش
مسافر بلاد الواق واق ولا داخل العمليات دي بتتكلم 100 مرة في اليوم وكل
مرة القفلة كدا
وخلاص بقي الراجل كره نفسه وعاوز يهبد السماعه في وشها تلاقي اللي بيقولك
Take care يعني ايه والنبيTake care هو أنا فوق الهمالايا ونازل ولا رايح
أتخانق مع أولاد أبواسماعين .....
لا وخدوا دي
أول ما تتصل بيا واحده وأقول آلو تلاقي اللي بيقولك مالك ؟ صوتك متغير كدا
ليه ؟ ايه اللي جرالك ؟ صوتك مش عاجبني ؟ حاساك متغير النهاردة ؟ مخبي
عليا إيه قولي ؟؟ طمني ؟؟ ياربي دا انا ما قولتش غير آلوو أقعد أحلف إن
أنا كويس وما فيا أي حاجة أبدا بس بعد الكلام دا كله واصرارها ان انا مخبي
عليها حاجة وأنا مش مخبي أي حاجة كان لازم أجاري مشاعرها مادام هي مخضوضه
لازم يكون عندي حاجة تخض أنا كمان آمال تتخض علي الفاضي كداا لازم آجاريها
أقولها عندي إنفلونزا " ترقع بالصوت " وتقول عملت Check up روحت للدكتور ,
يا نهاااااااااااااار آمال لو قولتلك عندي إنفلونزا الطيور هاتعملي إيه
؟؟؟ دا إنفلونزا عادي يعني .....
شوفتوا إزاي يا جماعه كلنا نازلين حب في بعض وخوف علي بعض , كل الكلام حلو وجميل
حب حب حب , لا أنا كمان مش مكفينا عيد حب واحد بس في السنة لا عندنا إتنين واحد في 14 فبراير والتاني 14 نوفمبر
اتنين فالنتاين
حب حب حب في كل مكان حب وفي كل وقت حب
م ن ق و ل